چینی شہریوں کو مفت ویزہ کی سہولت رواں ماہ سے دستیاب ہو گی، وزیراعظم

وزیر اعظم شہباز شریف نے کہا کہ چینی شہریوں کو مفت ویزہ کی سہولت 14 اگست 2024 سے دستیاب ہو گی۔

بزنس ریکارڈر کی رپورٹ کے مطابق وزیر اعظم نے 12 رکنی اعلیٰ سطح چینی وفد سے ملاقات کے دوران کہا کہ مشترکہ منصوبے دونوں ممالک کے مفاد میں ہیں، انہیں یقین ہے کہ وفد کا دورہ بہت مفید ثابت ہوگا۔

انہوں نے مزید کہا کہ چینی قیادت سے ملاقاتوں کے نتیجے میں اعلیٰ سطح کے وفود پاکستان کا دورہ کر رہے ہیں۔ وزیراعظم نے کہا کہ اس دورے سے صنعت، زراعت اور خصوصی اقتصادی زونز میں تعاون بڑھے گا اور چینی وفد کے نتیجے میں سرمایہ کاری آئے گی۔ انہوں نے کہا کہ دونوں ممالک میں کان کنی، معدنیات اور آئی ٹی میں بھی تعاون کو فروغ دیا جائے گا۔

وزیراعظم نے چینی وفد کو بتایا کہ کابینہ کے آخری اجلاس میں چینی شہریوں کو مفت ویزا دینے کا فیصلہ کیا گیا ہے اور اس فیصلے پر 14 اگست سے عمل درآمد ہوگا۔