لانگ مارچ کو اسلام آباد میں داخلے کی اجازت دی جائے یا نہیں، فیصلہ نہیں ہوا: رانا ثنا

اسلام آباد(کیو نیوز)وزیرداخلہ رانا ثنا اللہ کا کہنا ہے کہ ابھی فیصلہ نہیں ہوا کہ لانگ مارچ کو اسلام آباد داخل ہونے کی اجازت دی جائے گی یا نہیں۔پروگرام نیا پاکستان میں بات کرتے ہوئے رانا ثنا اللہ نے کہا کہ عمران خان نے صرف کاروباری شخصیت کے ذریعے شہبازشریف کو پیغام نہیں پہنچایا بلکہ پچھلے دنوں اسی قسم کا رابطہ فواد چوہدری اور پرویز خٹک نے بھی کیا تھا۔

انہوں نے تجویز بھیجی تھی کہ تین نام میں دے دیتا ہوں، تین نام آپ بھیج دیں تاکہ اتفاق رائے سے آرمی چیف کا تقرر ہو جائے۔وزیرداخلہ رانا ثنا اللہ نے تصدیق کی کہ حکومت نے اسلام آباد کے ریڈ زون کو بڑھا دیا ہے۔انہوں نے کہا کہ ریڈ زون کی حدود کو صرف ریڈ زون کی حفاظت کی تناظر میں بڑھایا گیا ہے۔

رانا ثنا اللہ کا کہنا تھا کہ جس مقام کیلئے انہوں نے این او سی مانگا ہے اگر وہاں پرامن رہنے کی یقین دہانی کرواتے ہیں تو پھر فیصلہ کیا جا سکے گا کہ ان کو وہاں تک آنے دیا جائے یا پھر جو ویڈیو کل سامنے آئی ہے اس کی بنیاد پران کو داخل نہ ہونے دیا جائے۔ان کا کہنا تھا کہ ابھی فیصلہ نہیں ہوا کہ لانگ مارچ کو اسلام آباد میں داخل ہونے کی اجازت دی جائے گی یا نہیں۔